En Anglio la germanaj spionoj, malkovritaj de la sekretaj britaj agentoj pri sekureco, estis abunde superŝutitaj de falsaj novaĵoj. Dume la germanaj aviadiloj plurfoje rekunportis fotojn de veturantaj kirasdivizioj post pluraj observadoj de la sudorienta regiono de Anglio. Sub la videbla komando de la generalo Patton, la plej timegita militĉefo de la Germanoj, vera armeo amasiĝis por onta batalo en Europo. Nekontesteble.
Tiuj divizioj, ne batalantaj, tiuj tankoj el ligno aŭ el kaŭĉuko daŭre erarigis la germanan stabon. Tiu plano "Fortitude" tiam persvadis Hitleron, ke la "vera" elŝipiĝo okazos en Pas-de-Calais, la plej norda parto de Francio kaj la plej proksima de la anglaj marbordoj, ne aliloke.
La mareŝalo von Rundsted, ĉefkomandanto de ĉiuj teraj soldataroj en okcidenta Europo, ankaŭ samopiniis kiel sia estro. Nur Rommel malsamopiniis. Li multobligis la diversajn defendojn de la marbordoj, precipe sur la normandaj plaĝoj. Sed li havis nur tri disponeblajn kirasdiviziojn, kaj inter ili unu solan tuj proksime de la plaĝoj de Calvados.
Ĉiuj aliaj kirasdivizioj jam estis en Pas-de-Calais. Tamen Rommel estis trankvila kiam li vizitis Hitleron en Berlino por havigi al si pli da tankoj. Ĉar la germanaj meteorologistoj anoncis tempeston por la 5a, 6a kaj la 7a de junio.
Sed la germana meteo ne prognozis la momentan kvietiĝon ...
Aucun commentaire:
Enregistrer un commentaire